2024 წლის სექტემბერ-ოქტომბერში გოეთეს ინსტიტუტთან პარტნიორობით – პროექტის, “შემოქმედებითი კომპასი” ფარგლებში – CinExpress-ის, ბოლნისელი ახალგაზრდებისა და მოწვეული კინემატოგრაფისტების დახმარებით, ქალაქ ბოლნისში მოზარდებისთვის კინოსახელოსნო მოეწყობა.
პროექტი “კინოსახელოსნო მოზარდებისთვის ბოლნისში” 14-17 წლის მოსწავლეებისთვის ერთთვიანი სახელოსნოს ორგანიზებას ითვალისწინებს, რომელიც სულ 8 სესიისგან შედგება. სესიის ხანგრძლივობა საშუალოდ 2-3 საათი იქნება.
კინოსახელოსნო 21 სექტემბრიდან 13 ოქტომბრის ჩათვლით ყოველ შაბათ-კვირას ბოლნისის ზრდასრულთა განათლების ცენტრში მოეწყობა. მისამართი: ბოლნისი, სულხან-საბა ორბელიანის ქუჩა 197.
სახელოსნოს პროგრამა შედგება როგორც თეორიული, ისე პრაქტიკული ნაწილისგან. სახელოსნოს თეორიულ ნაწილს გაუძღვებიან CinExpress-ის სარედაქციო ჯგუფის წევრები: ლიკა გლურჯიძე, ალექსანდრე გაბელია, გიორგი ჯავახიშვილი და ნინი შველიძე. CinExpress ონლაინ-პლატფორმა და მოძრაობაა, რომლის წევრებიც კინოს მკვლევრები არიან. ჯგუფის წევრები აქტიურად თარგმნიან კინოს ლიტერატურას, წერენ ქართულ და მსოფლიო კინოზე, აშუქებენ ადგილობრივ და საერთაშორისო კინოფესტივალებს, საქართველოს კინოაკადემიასთან პარტნიორობით კი, კინოს სახლში კინოჩვენებებს მართავენ. სახელოსნოს ფარგლებში მოზარდებს შეხვედრის საშუალება ექნებათ რეჟისორ ალექსანდრე კობერიძესთან, კინოოპერატორ გიორგი შველიძესთან და საქართველოს კინოოპერატორთა ასოციაციის სხვა წარმომადგენლებთან, კინომხატვარ ანიკო იაკობაშვილსა და ფილოსოფოს ავთანდილ ძამაშვილთან.
8 სესიის განმავლობაში მოზარდები შეძლებენ:
- გაეცნონ ქართული და მსოფლიო კინოს ისტორიას;
- გაეცნონ მხატვრულ და დოკუმენტურს კინოს;
- გაიგონ როგორ იქმნებოდა მათი საყვარელი სცენები კინოში და გაიფართოონ შემოქმედებითი უნარები;
- მიიღონ პრაქტიკული ცოდნა კინოს შესახებ, კინორეჟისორის, კინომხატვრისა და კინოოპერატორის დახმარებით;
- ნახონ როგორც მოკლემეტრაჟიანი, ისე სრულმეტრაჟიანი ფილმები (სულ 4 ფილმი) და ჩაერთონ ფილმის შესახებ დისკუსიებში;
კინოსახელოსნოს ფარგლებში მოზარდებთან მუშაობა შედგება 3 ძირითადი კომპონენტისაგან:
- ლექციები და კინემატოგრაფისტებისგან გამოცდილების გაზიარება;
- კინოჩვენებები და დისკუსიები;
- პრაქტიკული მუშაობა.
პროექტის მონაწილე მოზარდები კონკურსის გარეშე, აპლიკაციის შევსების საფუძველზე შეირჩევიან. აპლიკაციების მიღების ბოლო ვადა 10 სექტემბერია. კინოსახელოსნოში მონაწილეობის მიღება უფასოა.
რეგისტრაციისთვის გთხოვთ ეწვიოთ ბმულს:
https://docs.google.com/forms/d/1UPwksPRRX_JfMPuU6RMjbeyPRC8QhinhpRuiDXTZN4w/edit?usp=drivesdk
პროექტის მიზანია, კულტურული ცხოვრებისა და სივრცეების აშკარა დეფიციტის პირობებში, ბოლნისელ მოზარდებს მისცეს საშუალება ჩაერთონ შემოქმედებით პროცესებში; განივითარონ შემოქმედებითი და კრიტიკული აზროვნების უნარი კინოხელოვნების დახმარებით; გაიცნონ დარგში მოღვაწე საინტერესო პროფესიონალები, გაიზიარონ მათი გამოცდილება და აქტიურად ჩაერთონ კულტურულ ცხოვრებაში.
ამ ყველაფერთან ერთად, მონაწილეებს საშუალება ექნებათ, საკუთარი წვლილი შეიტანონ ბოლნისის კინემატოგრაფიულ ცხოვრებაში, რომელიც დღეს ბოლნისის კინოთეატრის გარშემო არსებობს!
“კინოსახელოსნო მოზარდებისთვის ბოლნისში” ხორციელდება პროექტის „შემოქმედებითი კომპასი“ საგრანტო კომპონენტის “შემოქმედებითი კავშირები” ფარგლებში, რომელიც საქართველოს რეგიონების შემოქმედებით სექტორში ახალი შესაძლებლობების გაჩენას, ცოდნის გაცვლასა და თანამშრომლობითი კავშირების გაღრმავებას უწყობს ხელს. პროექტი „შემოქმედებითი კომპასი“ დაფინანსებულია ევროკავშირის მიერ და საქართველოს გოეთეს ინსტიტუტის თანადაფინანსებით ხორციელდება.
