საქართველოს კინემატოგრაფიის ეროვნულმა ცენტრმა მოკლემეტრაჟიანი ფილმების კონკურსის გამარჯვებული პროექტები გამოაცხადა.
კინოპროფესიონალებისგან შემდგარმა კომისიამ 49 პროექტიდან 8 პროექტი და ავტორი შეარჩია, რომელთა შორისაც მოხვდნენ CinExpress-ის სარედაქციო ჯგუფის წევრები — გიორგი ჯავახიშვილი (თავისუფლება — პროდიუსერი: შ.პ.ს. სინექსპრეს ფროდაქშენს) და ლევან ცხოვრებაძე (მეთევზის ტვირთი — პროდიუსერი: შ.პ.ს. სინექსპრეს ფროდაქშენს)
სინექსპრესი (CinExpress — Cinematic Expression) წარმოადგენს ქართველ კინემატოგრაფისტთა გაერთიანებას. პლატფორმა 2019 წელს დაარსდა და ამ დრომდე მკითხველს არაერთი მნიშვნელოვანი კინორეჟისორის ნამუშევრის ანალიზი, თეორიული ნაშრომების თარგმანი, ანალიტიკური სტატიები, ესეები, ინტერვიუები თუ საერთაშორისო ფესტივალების მიმოხილვების წაკითხვა შეეძლო. 2022 წლის იანვარში კი კინოცენტრის მხარდაჭერით პირველი ელექტრონული კინოს ჟურნალი (ლინკი: https://cinexpress.ge/wp-content/uploads/2022/01/CinExpress-magazine.pdf) გამოიცა, რომელიც დაახლოებით 200 გვერდს შეადგენს და აერთიანებს სხვადასხვა ავტორის ესსეებს, თარგმანებსა და ინტერვიუებს.
სინექსპრესი, დღეიდან ოფიციალურად საპროდიუსერო კომპანიაც (CinExpress Productions) ხდება და მისი შემოქმედებითი ჯგუფი მომავალი წლიდან სხვადასხვა კინოპროექტებზე დაიწყებს მუშაობას.
