საქართველოს კინემატოგრაფიის ეროვნულმა ცენტრმა მოკლემეტრაჟიანი ფილმების კონკურსის გამარჯვებული პროექტები გამოაცხადა.
კინოპროფესიონალებისგან შემდგარმა კომისიამ 49 პროექტიდან 8 პროექტი და ავტორი შეარჩია, რომელთა შორისაც მოხვდნენ CinExpress-ის სარედაქციო ჯგუფის წევრები – ლევან ცხოვრებაძე ( „მეთევზის ტვირთი“ – პროდიუსერი: შ. პ. ს. „სინექსპრეს ფროდაქშენს”) და გიორგი ჯავახიშვილი („თავისუფლება“ – პროდიუსერი: შ. პ. ს. „სინექსპრეს ფროდაქშენს”).
სინექსპრესი (CinExpress – Cinematic Expression) წარმოადგენს იმ ქართველ კინემატოგრაფისტთა გაერთიანებას, რომელთაც 2019 წელს დაარსეს კინოს ონლაინ პლატფორმა cinexpress.ge, რომლის ფარგლებშიც ამ დრომდე მკითხველს არაერთი მნიშვნელოვანი კინორეჟისორის ნამუშევრის ანალიზი, თეორიული ნაშრომების თარგმანი, ანალიტიკური სტატიები, ესსები, ინტერვიუები თუ საერთაშორისო ფესტივალების მიმოხილვები შესთავაზა. 2022 წლის იანვარში კი კინოცენტრის მხარდაჭერით პირველი ელექტრონული კინოს ჟურნალი (ლინკი: https://cinexpress.ge/wp-content/uploads/2022/01/CinExpress-magazine.pdf) გამოსცა, რომელიც დაახლოებით 200 გვერდს შეადგენს და აერთიანებს სხვადასხვა ავტორის ესსეებს, თარგმანებსა და ინტერვიუებს.
სინექსპრესი, დღეიდან ოფიციალურად საპროდიუსერო კომპანიაც (CinExpress Productions) ხდება და მისი შემოქმედებითი ჯგუფი მომავალი წლიდან სხვადასხვა კინოპროექტებზე დაიწყებს მუშაობას.